導演林超賢昨日聯同謝霆鋒、張家輝、苗圃、鍾舒漫、吳浩康、陸毅及一眾《証人》班底出席英皇電影《綫人》開鏡，白龍王派徒弟到場主持拜神儀式。

謝霆鋒（右起）、陸毅、苗圃及張家輝在街頭舉行開鏡拜神。	新片演員一同切燒豬，祈求拍攝順利。	吳浩康與鍾舒漫在新片中有突破的演出。

剛從寧波返港的霆鋒踢拖現身，面露疲態的他說：「我畀栢芝同囝囝傳染，有啲唔舒服，栢芝依家成日嘔，比起佗Lucas時嘔得仲多，雖然仲未知係仔定女，但Lucas好似知道屋企就嚟有個新成員咁。（《綫》片同邊個有床戲？）暫時要保持神秘，總之未合作過！銀幕上我未演過床上戲，都唔知點做，細節仲要傾，我同導演講咗：『我未Ready好！』（驚栢芝呷醋？）係自己問題啫！（導演話明益你！）不如我同家輝演，我將處男作留畀佢！」

不過，家輝對於霆鋒「好意」並未照單全收，事關導演早已安排他與女對手大演床戲，他說：「有幾激就要睇導演啦！睇佢讓半球定兩球！不過部戲唔係賣弄色情，會點到即止，唔會太露骨。（同老婆備定案？）唔使，工作上我有自主權，返到屋企就冇Say。（霆鋒有冇同你分享再做老竇喜悅？）霆鋒再做老竇好吖！我頭先都有恭喜佢！」

鍾舒漫演援交少女

鍾舒漫則在新片中飾演援交少女，她說：「想為角色做資料搜集，但唔知點入手，惟有上網睇新聞了解援交心態。（使唔使演床上戲？）需要到嘅都會去做，會努力嘗試。」而導演林超賢對於霆鋒未有心理準備拍床戲，他說：「我都未話佢知對手係邊個，場戲係劇情需要，個女仔係台灣演員嚟嘅，拍過電影，但詳情唔可以透露。仲有場戲講霆鋒成架車撞入金舖，我想喺鬧市取景，依家煩緊點Set堂景。」