自01年加入無綫的陳敏之，拍劇時遇過不少辛酸事，但她認為食得鹹魚抵得渴，捱苦亦沒有甚麼大不了：「我哋經常要着住厚厚嘅古裝衫喺夏天開工，又要戴住好重嘅頭飾做戲，雖然辛苦，但呢啲係必經過程，個個都係咁就唔算得係乜。」

陳敏之曾因拍劇冇時間洗頭導致頭皮生瘡，又痕又痛苦不堪言。

陳敏之不經不覺已入行８年。

捱更抵夜慘情

不過，生頭瘡的經歷卻令敏之十分難堪，她說：「有次拍時裝劇，造型上需要駁髮，每次開工都要噴好多Hair Spray（噴髮劑），但開工成日要日夜顛倒，甚至三日冇得瞓，更加冇得洗頭啦！搞到啲頭髮成『餅』嘢咁，可能因為太污糟，最後搞到生頭瘡。」

由於拍劇時間太趕，她未有求醫：「啲頭瘡生喺頭皮裏面，好似塊面生暗瘡咁，又痕又痛，但真係冇時間理，亦冇特別睇醫生，只要捱完三個月，拍晒成套劇有時間休息，就會不藥而愈。」

除生頭瘡外，另一問題是皮膚質素變差：「試過兩、三日冇沖涼，加上成日要化妝，皮膚變得好乾，所以放假時會盡量休息，敷番多啲Mask補充水分。」

文：專案組