夢夢昨晚穿上性感超Deep V連身裙亮相《翡翠歌星賀台慶》，雖然薄施脂粉，但仍難掩憔悴，死撐上陣的她解釋在港期間已患上感冒，但竟與朋友勁食魚生，未知是否因此出事，大前日到達澳門即肚瀉大作，更多次入院求醫，她說：「係自己唔聽話冇戒口，去到酒店已經不停肚屙，但嚟到只有頂硬上，去咗當地醫院打止痛針再排練，點知夜晚又再屙，惟有再去醫院，醫生都話冇辦法，夜啲仲可能發燒，點知真係！」

夢夢（左）因上吐下瀉而三度入院求醫。

夢夢無懼病魔再襲，繼續大吃大喝。

其後已退燒的她至昨日再感不適，但她仍堅持演出：「我唔想影響大家排練，見到鄭裕玲、陳奕迅佢哋個個都企晒喺度，都唔好意思坐，排完先去醫院。」數日來多次入院，醫生指她有機會患上「盆腔炎」，需回港再作詳細檢查，面色蒼白的她說：「係咁出入醫院，有啲醫療人員都認得我！醫生幫我吊完鹽水，我就趕返去行紅地氈，惟有手上貼住膠布啦！唔知點解咁黑，咩都谷晒出嚟，仲生埋眼挑針！」

驚有婦科病

她指經理人曾勸她放棄演出，卻遭她一口拒絕：「醫生都睇咗咁多次，唔表演咪好唔抵？又唔係財多，唔知點解身體弱，其實都有啲驚，因為都有兩年冇做婦科檢查，已經瘦㗎啦！連兩両肉都冇埋。」在節目中，夢夢除為出席開幕與閉幕外，更聯同跳得之人陳偉霆、鍾舒漫及狄易達等勁歌熱舞，由頭撐到尾！