成功升呢後嘅Angelababy，經常周圍飛，早前小小So喺巴黎撞到佢，於是齊齊喺巴黎街頭歎Tea，Baby慨嘆近排忙到連私人時間都冇！
小小So：係咪好少時間見屋企人？
Baby：係呀！不過我自細都慣咗一個人，因為爹哋係生意人，媽咪成日陪佢周圍飛。
小小So：你咪好獨立？
Baby：都係，我試過一個人住！我同細佬相差幾年，由細恰到佢大，佢到依家都好驚我，你估唔到我係惡家姐呢！
小小So：睇唔出你咁惡！你哋一齊住？
Baby：細佬仲喺上海讀緊書，同婆婆一齊住。不過我一到20歲，突然好重親情，覺得有責任努力賺錢，等家人享福！
Baby話佢得呢一個親細佬，因為以前恰得佢多，依家要作出補償，話佢要乜都會盡量畀佢，遲啲仲送佢去外國讀書添！