今年視后之爭特別激烈，賽前呼聲最高的鄧萃雯本來坐定粒六，勢憑「四奶奶」初嘗視后滋味。不過，無綫為保「親生女」，特意把台慶頒獎禮押後舉行，令兩大台慶劇《宮心計》與《富貴門》趕上尾班車爭獎，更狂谷楊怡演大奸角。
雖然提名名單將於下月五日才公布，但《宮》劇上周平均收視33點，比首周平均收視28點的《巾》劇高出成條街，難怪《宮》劇已壓倒《巾幗梟雄》，成為最多提名的劇集。不過，大熱門楊怡被指不夠奸，演技未夠火候，相反阿佘的「三好」角色卻異軍突起，隨時有力憑劇集人氣而翻叮成為奪獎大熱！曾表示只看好毛舜筠、當「佘楊」冇到的雯女，眼見大勢已去也似乎放軟手腳，對爭獎半扯白旗！
雯女昨日出席傷健牧師Nick Vujicic布道會，拋出愛神不愛獎言論：「其實你哋唔使再問我想唔想攞獎，獎項唔係我追求嘅嘢，有神喺我身邊，如果咁都唔開心就好Stupid！」其後，被問到為何叫人不要再提獎項？雯女說：「我想講我係唔在乎外面（物質）嘅嘢！我已得到生命真諦，點解仲要爭個獎呢？」
網友睇好楊怡
除了雯女外，另一熱門袁詠儀（靚靚）對獎項也不在乎，她前晚與戚美珍出席《至八女人心》，被問到有傳因阿佘曾與張智霖傳緋聞而要「釘死」對方，靚靚聞言笑說：「一路都係傳媒製造我同阿佘嘅關係，我未同佢合作過，以我嘅性格，可能做到朋友，只係冇機會啫！（有冇興趣做視后？）問得好，本來冇，既然咁寫點解唔攞？不過我講明頒獎禮我唔喺香港，所以唔會出席！」向來缺席冇獎，靚靚如此說來，攞獎機會又大大降低。
雯女與靚靚爭獎半投降，另一邊廂的阿佘卻對視后虎視眈眈，她前晚出席謝雪心請客的慶功齋宴時風騷地說：「畀心姐捷足先登，我拍緊另一套劇，其實都想請食飯！（收視報捷喎！）八點半檔有咁嘅成績真係好好，我享受緊套劇帶畀我嘅喜悅！（傳你拍劇時向監製插楊怡！）用乜插呀？有冇咁毒？自己冇做過，唔知點解咁寫！」可是，在多個投票區的視后票選中，甚有觀眾緣的楊怡均以些微票數壓過雯女，反觀阿佘則敬陪末席，但只有雯女與阿佘比併的票選中，雯女則以大比數拋離對手，看來楊怡與阿佘應繼續有一番惡鬥。