憑無綫台慶劇集《宮心計》成為本屆台慶頒獎禮「視后」大熱門的楊怡，原來心中一直視金城武為超級偶像，她說：「其實我一向都貪靚仔，金城武93年嚟香港發展，當時已經覺得佢好靚仔，除咗高大威猛之外，又眼大大，笑起上嚟仲有兩個酒窩，真係好迷人，記得佢第一套演嘅戲係《東方三俠2》，當時佢仲係同梅艷芳、張曼玉、楊紫瓊合作，而咁多套作品之中我最鍾意《心動》同《向左走向右走》，其實差唔多佢所演嘅電影我都有睇，名副其實係佢超級擁躉。」
問到當年曾否「追星」，楊怡說：「冇！我只係心中默默支持嗰隻，入行後其實都好想同佢合作，不過冇機會！記得有次喺機場撞到佢，我即時好似小Fans咁，不時偷望佢，但又怕醜唔敢行埋去，如果依家畀我同佢合作，我相信自己一定緊張到頻頻NG！」