昨日鍾楚紅以代言人身份，出席護膚品牌記者會，低胸上陣配上價值128萬伯爵腕錶的她不時跌膊騷Quali，盡展美態。她透露現在生活健康，不時到山區探訪及出外旅遊，問到可有男士追求，她說：「直頭冇添！（接受異地戀？）冇諗過，去旅行唔會諗住識人。我好鈍，有人追都唔會知！」問到是否有心理準備接受另一半時，她表示「愛」很重要，但不限於異性，家人和朋友都需要。

鍾楚紅表示未有考慮整容，因心中沒有老字。

鍾楚紅穿上性感低胸裙，明艷照人。

見劇本唔心動

由於整容日趨普遍，問到有否考慮整容時，紅姑反應甚大地說：「乜我都要咩？冇諗過，我心目中冇『老』呢個字，係你哋提啫！唔好成日追住我影就冇乜嘢！」很久未有幕前演出的紅姑坦言，不斷有劇本寄給她，但她卻未有復出打算，她說：「唔會心動嘅！邊有人搵，幾十歲，有先算啦！（影壇青黃不接？）叫我演甘草？唔好啦！唔係怕辛苦，拍咗咁多年鍛煉過好多。」問到有高酬勞會否接拍廣告，她笑言視乎產品性質：「電飯煲、雪櫃就唔好！咁師奶！」對於先夫在峇里的度假村問題，她說：「我冇理嘞！交晒畀公司。呢個係老公同我嘅Dream，佢唔喺度我都唔想再睇番！」