早排小小So喺上海時裝騷撞到張燊悅，傾偈嗰陣佢全程講湊仔經，提起囡囡即滔滔不絕，講扮靚買衫就輕描淡寫！
小小So：你每季用幾多錢置裝？
張：好少錢咋，買啲靚啲Pieces就夠，唔一定用好多錢買好貴嘅嘢。
小小So：你收番身，滿唔滿意身形？
張：因為條裙Cutting OK，依家身形OK，唔想太瘦，我係媽咪嚟㗎！
小小So：囡囡幾大喇？
張：囡囡八個幾月大，識得講「爸爸、媽媽」、又成日
呀呀，好似喺度唱歌咁。我飛過嚟幾個鐘已經好掛住佢，掛死我喇！
小小So：囡囡易唔易湊？
張：好易湊，佢唔扭計。佢有性格、脾氣，但我服侍得佢好周到。
小小So：囡囡黐你定爹哋多，又似邊個？
張：黐我多啲，成日見住嘛！佢都黐爹哋，但爹哋要返工，見面時間冇咁多。我全職照顧佢，搵工人湊怕寵壞佢。囡囡似男版嘅我同女版嘅爹哋。
小小So：生多個細佬或細妹陪囡囡？
張：會呀！但要保養番身體先，成30年嘅營養全部畀晒第一個，第二個咪冇！