日前炮轟《美女廚房》監製錢國偉（Wilson）逼去飯局的「豆沙包」梁梓悠（前名梁懿晴），近日反被對方踢爆因「開工爛瞓」被叮，而春卷王宝宝等「美味天使」亦將矛頭直指豆沙包，令她腹背受敵！本報昨日發現她與經理人到銅鑼灣行街減壓，還拿起電話細聲講大聲笑，心情似乎已平復。被問到與Wilson的風波時，她甚為避忌，再問到被天使倒戈相向時，她即時逐點反擊！

豆沙包與經理人行街減壓，心情已平復不少。	豆沙包（左三）坦承不及其他天使識做人，似乎有弦外之音。	錢國偉

豆沙包強調踢爆Wilson「惡行」純為講出真相：「我冇同人講過有人逼我去飯局，我唔知嗰啲係咪飯局，我一次都冇去過！」她坦言因此受到不少委屈。問到昔日好姊妹是否因買Wilson怕而圍攻她？她說：「只怪我同佢（Wilson）嘅交情唔夠其他女仔深！春卷同我根本唔熟，我唔明點解佢哋咁講我！」

否認偷懶

她表示堅拒與Wilson再合作：「佢咁憎我，應該唔會喇！我都唔想同我唔鍾意嘅人合作！」問到精神有否受困擾？豆沙包說：「我冇諗呢啲嘢！佢哋都唔係我世界嘅人，冇話困唔困擾！佢哋傷害唔到我！」對於被Wilson斥她開工偷懶，她說：「可能係大家對懶嘅定義唔同，佢梗係會咁講我啦！」