谷祖琳（小谷）早排同好友茜利妹一齊做嘢，小小So一早去現場「八吓」，可能要早起，小谷仲未好精靈，佢發現自己啲唇色唔夠，問茜利妹有冇唇彩。當茜利妹打開個化妝袋，小谷即時「叮」一聲醒晒，究竟乜嘢令佢咁醒神呢？咪就係女人至愛嘅扮靚用品囉！
茜利妹攞完支唇彩，跟手攞盒名貴嘅護膚品出嚟，好興奮同小谷講：「有朋友做美容產品PR，我哋傾開啲皮膚好乾，佢即刻送咗一套護膚品畀我呀！今季慳番唔少！」小小So望吓佢手上拎住嗰盒都成二千幾蚊，如果買齊成套都要七千幾蚊先得！小谷即刻發揮女性本能話：「快啲打畀你個Friend，話你有個Friend啲皮膚好Dry，仲有皺紋添呀！」
嘩！女人貪靚起上嚟，踩自己皺紋多都唔介意！