現年45歲的張曼玉與德籍建築師男友Ole Scheeren恩愛爆燈，昨日她卻撇低男友，獨自到台北出席Qeelin珠寶品牌Yu Yi系列首次亞洲發布會，力撐前男友Guillaume Brochard和好友陳瑞麟。風騷到爆的曼玉穿上Deep V裙亮相，與前男友言談甚歡，毫不避嫌，對記者更是有問必答，非常友善，她說：「我依家唔係長駐北京，依然心繫香港。」

問到保養得好是否因愛情滋潤？曼玉說：「功歸化妝師同攝影師，唔覺得談戀愛係保養方法，但因為會好開心，好開心就會好看，所以可以說跟戀愛有關係。」對於拉面皮或整容，她說：「因為好普遍，不單止有錢太太，普通人都做到。好多人唔認為呢啲叫整容，因為只係打支針，好容易。每個女人都掙扎，好誘惑，我試過好大掙扎。」曼玉曾想過年紀老或者去做，但覺得有皺紋是很自然的事，刻意平滑反而奇怪：「希望到時大家接受我有皺紋，希望到60歲前我唔會改變呢個諗法！」

自嘲高齡 考慮領養

至於再婚，曼玉說：「已結過，冇諗再結多一次，依家冇呢個打算，通常想結婚都係未結過嘅女仔，可能係每個女仔夢想都想做一次，如果有一日覺得要做先會做，但唔係依家。（Ole求婚？）冇，大家都明大家諗法，都傾過，佢知我想點，大家感情好穩定！」她續說：「上次結婚係自己踢爆，唔想畀人揭穿，畀人亂寫！（生BB？）唔會喇！但可能領養，一直好鍾意小朋友，但生小朋友計劃同想做嘅嘢夾唔到，可能男友想生，但發現真命天子唔係佢！」曼玉強調從未想過生試管嬰兒：「依家生有啲困難，所以都係幾年後想領養。」

文：專案組　攝：吳文聰台北傳真