汪詩詩早排撇低一對仔女，去上海出席老友羅可璇（Victoria）嘅時裝騷，佢話畀小小So知專程捧場嘅原因係為咗個寶貝女，原來詩詩嘅囡囡Jasmine同Victoria嘅囡囡鬼咁老友，之前仲一齊行過Show添！詩詩仲話畀小小So知，Jasmine不嬲都好有表演欲，佢仲成日叉住條腰擺甫士同Victoria個女講：「嚟啦！You Follow Me，我係Model嚟㗎！唔使驚！」認真盞鬼！雖然囡囡好大膽，但原來都好黐媽咪，好似詩詩去咗上海，Jasmine就打電話喊住同佢講好掛住佢，搞到詩詩好心疼。
講到一對仔女嘅趣事就特別多，詩詩話佢就快兩歲嘅仔仔James一樣咁搞笑，成日叫佢做「Elmo」（卡通人物），嗰頭教完佢叫媽媽，轉過頭阿仔又叫番佢做Elmo，所以詩詩依家要日日拎住張全家福教佢。詩詩仲同小小So呻仔仔好似有心玩佢咁，試過有次指住個鼻問仔仔：「呢個係邊個？」點知仔仔竟然答佢係「Nose（鼻子）」，激到詩詩唔知好嬲定好笑！