陳煒身為96年亞姐冠軍兼前晚評判之一，但一樣幫理不幫親，她說：「亞視不嬲鍾意搞Gimmick（噱頭），本來分組評佳麗無可厚非，但要佳麗企喺板後面凸胸，喺現場睇就覺得好笑，但觀眾透過鏡頭睇，可能會唔舒服，我諗冇塊板會好啲。好在係搵女Model上台解構，如果係搵男嘉賓，大家會仲唔舒服。」

亞姐解構佳麗胸部的環節，被狠批侮辱女性！ 資料圖片	陳煒怒插劉伊心講大話，不尊重觀眾。 資料圖片	劉伊心（左一）連戴牙套也不敢認，要司儀幫忙補鑊。

陳煒又點名力斥大熱(18)劉伊心：「最唔鍾意人講大話，好討厭佢講大話唔認戴牙套，佢嘅說話令到力證佳麗戴牙套嘅專業牙醫冇面，要司儀幫佢補鑊。我都有戴牙套但我敢認，佢唔尊重觀眾，喺問答環節我畀佢最低分。（佢照入圍喎！）入圍啫！咁佢個樣同身材都OK嘅！」

謝寧轟惹人反感

至於85年港姐冠軍謝寧，昨日出席《美食濃情樂團圓嘉年華》時說：「我冇睇，但聽落都覺得賣弄同唔尊重女性，好反感，女人應該內、外在美全面睇，智慧同美貌並重，完全反對呢種拆件式嘅選美，選美要有內涵，依家同o靚模展示胴體有乜分別？（擔心兒童受影響？）我諗咁嘅台冇人睇，令女性反感自然就轉台，點解亞姐搞咁多年都係咁呢？因為選美模式首先要尊重女性。」另一評判Ana R.昨日出席婚紗騷時慨嘆：「依家好多女仔整容，無論樣定身材，整咗好易睇得出，我想揀發自內在美嘅佳麗但好難，希望睇到佳麗表現出自信同真正嘅自己，我都有兩個心水入咗圍。」網民亦狂轟亞姐「專登Focus（集中）個胸，好Cheap爆！」、「專登Focus胸部畀人研究，太過侮辱！」；但有網友大讚亞姐有外貌和身材，遠勝港姐。

Ana R.表示難揀有內在美的佳麗。

謝寧則狂轟亞姐令人反感。

葉家寶死撐冇出事

亞姐負責人葉家寶就各界指亞姐不尊重女性一事回應：「製作上冇呢種感覺，只想將佳麗作深入全面睇，凸顯健康美。（夾胸畫面賣弄色情？）唔會，噱頭嚟啫！至今未收到任何投訴，賽制係咁玩法，觀眾覺得新鮮，評判唔會只睇個胸嚟評分。（劉伊心講大話？）呢個係女仔自己問題。（Ana R.話佳麗欠自然美！）有冇整容好難評定，留畀觀眾衡量。」此外，去年參選香港先生的落選港男陳冠標，前晚現身亞姐準決賽。陳冠標與兩名大隻佬化身「歡樂先生」，並身穿三角泳褲在台上舉牌。