離開金牌大風後，傅穎（Theresa）與鄧麗欣（Stephy）名正言順成為「宿敵」，日前Theresa大講台式潮語，回應與棒棒堂敖犬的緋聞，又在網誌大晒流暢英文，不禁令人懷疑她有意「暗寸」被插英文差的Stephy。昨日二人分別出席活動，對於被指暗寸Stephy，Theresa高呼冤枉，強調網誌於報道前上載，但據知早於本年3月，網友已不斷討論Stephy英文差，近日更成為Facebook熱話，單憑報道日期，未能完全洗清Theresa暗寸之嫌，對此Theresa說：「咩都攞嚟一齊講，我係無辜！（減少寫英文Blog？）中、英文都會畀人話，只係想抒發感受！」轉投星皓後密密接Job的她坦言會賺錢置業，但未有考慮在台灣買樓與敖犬拉近距離。

Stephy與小方合唱時被取笑記錯歌詞。

Theresa否認Blog寸Stephy英文差，強調只是抒發個人感受。

小方贊成闖荷里活

另外，Stephy與方力申昨日出席活動，對於疑似被「暗寸」，Stephy表示未有留意：「一路有物色緊英文老師！（搵外籍男友？）異地戀唔得，同外籍朋友相處過，覺得文化唔同！」她表示會勇於接受挑戰，不會拒絕英語訪問。而小方力撐Stephy進軍荷里活：「人梗有夢！唔可以扼殺！（陪佢去？）邊個唔想去？（英文被彈？）聽得佢講最多係Happy Birthday！」而合唱《好心好報》時，小方竟取笑Stephy記錯歌詞，令Stephy甚為尷尬。