26/10/2009

播放本新聞相關短片

四奶奶無懼夾擊當佘楊冇到

鄧萃雯(雯女)憑《巾幗梟雄》的「四奶奶」熱爆視后,但半途殺出佘詩曼及楊怡,雯女昨日明寸暗踩她們「未夠班」。

好戲之人鄧萃雯繼04年《金枝慾孽》的「如妃」後,今年再憑《巾幗梟雄》的「四奶奶」人氣急升,原本可以穩奪「最佳女主角」獎,惟她一直「唔畀面」無綫,多年來不肯簽約成為無綫「親生女」,早前更缺席台慶亮燈儀式,明剃無綫眼眉,令視后之爭添變數。

雯女與黎耀祥昨日在將軍澳電視廣播城為《巾幗梟雄》續集拍攝節目巡禮,他們透露新劇《巾幗梟雄之義海豪情》(暫名)將於明年三月開拍,原本有份演出的徐淑敏、吳卓羲及商天娥則「冇得留低」,由陳法拉頂上。對於早前缺席台慶亮燈,雯女說:「我之後去咗美加登台,因為媽咪60歲大壽,佢平時好怕坐長途飛機,但知道有柴九(黎耀祥)同菊姐(關菊英)就一定要去,我都要落力陪媽咪!」

續集冇親熱戲

有傳阿佘及楊怡是她登視后的最大對手,雯女突然「四奶奶」上身兼句句有骨:「對手何其多!你當毛毛死o架?!仲有毛毛(毛舜筠)呢,佢係我心目中嘅好演員!(祥仔話想同你一齊攞獎?)承佢貴言啦!有柴九喺度,四奶奶所有事都會迎刃而解!(有冇信心?)四奶奶梗係有信心,角色咁多人鍾意,但最緊要係柴九攞,柴九係四奶奶幫,佢攞即係我攞!」

祥仔聞言亦大賣口乖:「最緊要添哥(監製李添勝)攞,大家都開心!」雯女續透露《巾》續集將與祥仔有感情線,但不會有過激的親熱鏡頭,祥仔笑說:「咀戲未必啱我哋,希望觀眾有想像空間!」而雯女亦認為情感不用靠親嘴展示,這才是演技的最高境界。

此外,據本報收到可靠消息,無綫已落實男、女主角的入圍名單(見附表),除了雯女外,台慶劇《宮心計》的阿佘及楊怡,以及《富貴門》的郭可盈、袁詠儀及戚美珍亦順利入圍,反而去年力爭視后的「耆英團」關菊英及米雪雙雙「降呢」,僅入圍「最佳女配角」。

柴九攞硬視帝

其實雯女與阿佘的惡鬥早有前科,她們於04年《金枝慾孽》已埋牙,及至06年阿佘憑《鳳凰四重奏》擊敗《女人唔易做》的雯女榮登「雙料視后」,今次她們再重遇,勢必好戲連場!反觀男主角的競爭未算激烈,雖然鄭嘉穎、王喜及黃宗澤均憑《烈火雄心III》入圍,但人氣遠遜於入圍視帝的「柴九」黎耀祥,以及男配角大熱門「Laughing哥」謝天華,他們在全無競爭對手的情況下,可謂「坐定粒六」等攞獎!

第一手消息請瀏覽on.cc《即時新聞》

專案組