有「翻版薛凱琪」之稱的劉沛衡，與正版一樣擁有甜美笑容，最近經常見她在廣告中搶別人的一蚊買雪糕，敏捷又調皮。雖然她出鏡只有短短幾秒鐘，但已相當興奮︰「今次係我第一次拍電視廣告，好開心又好好玩，嗰日我哋拍咗四個鐘，雖然出鏡得幾秒，不過都好開心！我啲同學一見到，即刻打電話同我講，但係我當時喺街睇唔到，搞到我好心急，媽咪睇完就笑我個樣好傻！」

放大圖片	劉沛衡笑容甜美，難怪有「翻版薛凱琪」的稱號。	現修讀酒店管理課程的劉沛衡，望在模界闖一番事業。

恨與動物合作

雖然被媽咪揶揄，但沛衡並不介意︰「因為我好鍾意影相，咁啱我妹妹有個朋友做緊模特兒，佢就叫我Send啲相去模特兒公司，點知佢哋真係叫我上去試鏡，就係咁就入咗行！」她表示家人初時反對她入行：「我依家讀緊酒店課程，所以屋企人覺得我應該以讀書為重，好彩媽咪好支持我！」

此外，愛心爆棚的她最希望能跟動物拍廣告：「我冇諗過將來會做幾耐，做模特兒都係試吓同玩吓，冇咩壓力！但係如果有機會同動物一齊拍廣告就好喇，因為我好鍾意小動物！」

採：楊歡成　攝：黎志輝