小小So見盡唔少紅極一時嘅人因態度囂張而離奇「失蹤」，但出道三年幾嘅江若琳（Elanne），喺06年啱啱入行嗰陣，已經用心做好每件事，仲捱過唔少鹹苦添！雖然佢早期曾經面對一連串負面報道，Elanne依然保持樂天同豁達，對記者嘅態度仲相當友善添！相比其他同級歌手嚟得隨和，唔會將個人情緒發洩喺媒體身上。可能佢曾經艱辛過，所以更珍惜依家擁有嘅一切，絕冇恃紅生驕！Elanne除咗EQ高之外，仲好照顧一班新人，認真唔話得！
話說早前Elanne舉行22歲生日會，除咗公司嘅師弟師妹到場外，小小So當然有捧場啦！雖然佢身為當日的女主角，但Elanne冇忽略每一位出席嘅嘉賓，每次影相時，都總會搵機會拉埋師妹陳楚喬同Square四子一齊合照，積極提攜後輩，連小小So都忍唔住要激讚！有人話娛樂圈競爭大，每一個同行都有機會係自己嘅競爭對手，相信Elanne心中冇呢個概念，實行以真我性格繼續係娛樂圈發展。