自宿敵傅穎與楊愛瑾離開金牌大風後，近日終於榮升一姐的鄧麗欣（Stephy），心情靚爆，繼日前風騷開生日P自爆戀情後，昨日偕好姊妹吳雨霏（Kary）及師弟小肥出席無綫《翡翠歌星賀台慶2009》記者會，同場還有陳奕迅、G.E.M.、泳兒、鍾舒漫及江若琳等歌手，不過風頭卻被低胸上陣的Freeze搶晒，三女更成功攝位企正嘟姐鄭裕玲身邊，Eason亦要被逼到企最後一排！

姊妹搭膊支持

站在第二排的Stephy，雖然佔不到有利企位，但昨日全程相當風騷，她與Kary一同接受訪問時言談甚歡，即使被問到最近有網友指她用「I am very thanks them」多謝贊助商，英語文法比小學生還要差，但她仍不怒反笑說：「呢單網料唔係近日嘅事，冇為呢件事唔開心，呢啲新聞當聽古仔！」

問到是否接受善意批評？Stephy輕鬆地說：「冇睇到，所以唔會理，當時對方好突然咁用英文訪問我，我應變唔嚟，英文唔係我母語，希望可以進修一下，我嘅目標係打入荷里活！」此言一出，連Kary都打個「突」忍不住哈哈大笑，她似乎覺得Stephy勇氣可嘉，搭着對方膊頭說：「我好欣賞你呀！」難得Stephy仍一臉自信地補充：「係呀！人要有奮鬥目標，去內地登台都要進修國語啦！何況英文係國際語言！」明顯眼光夠遠大！

自信性感得起

除了對語言有信心，Stephy對自己身材亦有自信，提到《翡》當晚會以華麗為主題，她揚言不介意性感上陣：「我唔介意性感！要視乎靚唔靚，最緊要高貴！」她將與緋聞男友方力申合唱情歌。至於會與Eason合唱的Kary說：「細個已經好鍾意聽四大天王，個個都咁鍾意，好熟佢哋啲歌！」對於今年《翡》欠缺巨星級歌手，無綫綜藝及音樂科高級經理陳家揚坦言曾聯絡譚詠麟、李克勤及林子祥等，可惜時間緊迫難度期。