早前Jade透露在峇里舉行豪華婚宴,只宴請100名親朋戚友,而下月在香港舉行的派對,則邀請其他朋友及傳媒。早前見Jade在銅鑼灣閒逛,將榮升「楊太」的她精神爽利,皮膚白滑,當行經一間專賣婚宴蛋糕店舖時,即一支箭推門而入,只見她左望右望,一臉疑惑,店員眼見有大明星光臨,即火速遞上目錄表。Jade面對賣相精美的蛋糕,大感興趣,不斷在幾款6層高的蛋糕之間徘徊,心大心細,逗留了約半小時才離去。
其後Jade到利園二期一間紅酒店,只見她專攻貴價靚紅酒,似是為婚宴揀選靚酒,職員推介了2款貴價酒,更着她回家後與未婚夫先試飲,稍後才大量訂購,Jade點點頭同意後即付款,盡顯貴氣。
為婚宴一事密鑼緊鼓的Jade,離開紅酒店後,急急腳前往名店Bottega Veneta,甫進店即獲店員VIP身份的熱情招待,Jade指着飾物櫃,並拿起匙扣、鈔票夾及散紙包等研究,估計作為賓客回禮之用,索取一系列資料後,由司機接送離去。
煙花婚禮 夢想成真
事後記者致電Jade,她大方承認正籌備香港舉行的婚禮派對:「依家好頭痛呀!因為仲未訂場地,自己就想喺戶外舉行,因為地方闊落,可以請多啲傳媒朋友吖嘛!(去BV睇飾物?)係呀!打算做婚宴嘅回禮禮物!」
而Jade未婚夫Jonas,繼於Jade生日在威尼斯求婚後,其浪漫細心的好老公形象亦盡顯在婚宴安排上,Jade甜絲絲地說:「佢知我嘅Dream Wedding(理想婚禮)係要有煙花,所以就專登揀峇里,因為嗰度可以放煙花,不過要入紙申請囉!」據知峇里婚宴會豪花300萬,但為博老婆一笑,Jonas的決定絕對明智。
密謀豪送31萬BV
意大利皮革名牌Bottega Veneta(BV)設計簡約,作風低調務實,深受圈中名人靚太愛戴,擁躉包括王菲、陳慧琳、舒淇、鄭裕玲、莫文蔚及梁詠琪等。關心妍今次睇中該品牌約二千多元的匙扣及約四千元的銀紙夾,作為在峇里婚宴上送給百位賓客的回禮禮物,以各購買50個匙扣及鈔票夾為例,已要花費31萬元,但對有傳身家逾3億的Jonas而言,絕對濕濕碎。
文:音樂組