女藝人為咗表現最靚一面，難免要打扮得性感少少出席活動，騷吓胸、露吓長腿、晒吓背脊，成為全場焦點。性感嘅同時就要付出走光危機嘅慘烈代價，好多女星畀人影到走光之後，都忍唔住喊晒口，話晒都畀人睇蝕咗嘛！
不過，小小So就真係好佩服薛凱琪（Fiona）嘅EQ，佢前排嘅「走陰」事件一出街，都冇乜話尷尬或者傷心，反而成日將呢件事自嘲一番。Fiona向記者自爆開頭分唔到「走音」同「走陰」，咁啱現場就有個道具寫住「陰天」兩個字，班記者即刻拎去佢面前揚來揚去，幫佢上一堂認字班。佢唔嬲不特止，仲不停狂笑，認真傻氣十足！
當日小小So有事走先，點知Fiona竟然拉住小小So唔放，仲話：「唔好走啦！我一陣唱歌喎！走『陰』喎！走『私』喎！你唔睇喇？」小小So都忍唔住要讚吓呢個女仔，Fiona呢種器量真係好值得啲藝人學習，下下郁啲就黑面走人，咪就係EQ唔夠高囉！