對於日常生活細節，泳兒甚有研究，不過表面「企理」的她，卻遇過不少瘀事，面對大堆「藝人大起底」的問題，她馬上原形畢露，瘀事張揚。
個人習慣篇 愛個人遊睇名勝
問：鍾意跟團定個人遊？
答：梗係個人遊啦！跟團時間太緊迫，起床又早，好急，壞處係當去到每一個景點，冇辦法睇清楚該處嘅名勝，難得出外旅行，當然要慢慢欣賞，否則好嘥！
生活習慣篇 抗拒着鞋唔着襪
問：對於着鞋唔着襪有咩睇法？
答：唔得o架！會腳臭，我試過身邊有朋友唔着襪，出咗腳汗會好臭，換轉自己係咁，一定好難頂，因為對腳出咗汗仲焗喺鞋裏面，當除咗鞋時，發出陣陣臭味，一定尷尬死。
問：瞓覺有冇試過流口水同打鼻鼾？
答：試得多啦！有一次太早起身，之後又忙工作，到有時間於車上小睡，即刻控制唔住流口水，有一次李逸朗仲拍我流口水嘅片段，好瘀呀！
昔日回憶篇 英國文學最難讀
問：讀書時最差嘅成績係邊科？最叻又係邊科？
答：最差係英國文學，因為太多嘢要記，咁唔代表我記性差，而係所記嘅嘢太複雜、太深，所以我冇用心。不過，我最叻嘅科目係好少女仔得嘅，就係數學科，因為我好鍾意動腦筋，我好有興趣，數口幾精o架！
問：幾歲開始拍拖？初戀嘅感覺係點？
答：大學時期拍拖，21歲左右啦！嗰個係我同學，拍拖感覺好Sweet，而且係一段好美麗嘅回憶。
文、攝：影視組