近一百四十名無綫演員昨晚齊集電視廣播城出席《TVB42周年台慶亮燈》儀式，大部分演員均以戲服亮相，而邵逸夫則是最後一年以電視廣播有限公司行政主席身份主持亮燈儀式。每年台慶亮燈的排位均是藝人受重視程度指標，本年度首排花旦包括佘詩曼及楊怡，而「阿姐級」的鄭裕玲、汪明荃、李司棋、米雪及關菊英等均站於中間位置。至於第二排男藝人則由陳豪、黎耀祥、鄭嘉穎、林保怡及王喜等排中間，而「視帝大熱」黎耀祥則明顯「升呢」，與「親生仔」陳豪及鄭嘉穎並列中間。其他小生花旦如黃宗澤、馬國明、鍾嘉欣及陳法拉等則靠邊站，楊思琦更「冇影」。此外，「視后大熱」鄧萃雯及郭可盈則均缺席，正身在美國度假的雯女，其名字根本沒有出現在名單上，而可盈雖列入出席名單，但她以身體不適為由缺席。

睇好羅嘉良奪視帝

憑劇集《巾幗梟雄》中「柴九」一角而「升呢」的祥仔，對榮登「視帝」信心十足，更希望能與雯女齊奪「視帝」「視后」。問到雯女缺席有「唔畀面」無綫之嫌，他表示早前與雯女在美國登台，但她其後於當地繼續玩。問他會否覺得雯女是否缺席表達不滿，祥仔力撐好拍檔：「唔係嘅！佢有佢自己嘅時間表，如果佢喺香港都會出席，我知佢喺美國好多親戚，可能之前安排晒聚會！」他亦看好雯女奪視后：「但聽聞楊怡好犀利！」但視帝之爭，他亦不諱言《富貴門》中的呂良偉及羅嘉良極具威脅。談到羅嘉良早前坦言不知誰是「柴九」，他說：「唔出奇！佢主力喺內地發展，可能未睇過，一陣問吓佢係咪未睇過先！」但嘉良事後亦大讚祥仔的人氣勁，更獲Fans舉牌支持。

唔信可盈簽約換獎

至於站着當眼位的楊怡，被問到郭可盈被指簽約換獎，她說：「好呀！邊個攞都冇所謂！最緊要《宮心計》收得！（你係時候攞獎？）我仲有好多地方要改善，呢啲由觀眾做評判！」她更識做地讚雯女是她心目中的女主角。而阿佘則表示未有看過可盈簽約換獎的報道：「依家都未知邊個有份提名！（睇好雯女？）可唔可以睇好雯女同楊怡！（揀一個！）是但啦！總之一人一個獎！（你呢？）唔知！唔知有冇獎可以畀我呢！」

文：影視組