前晚Angelababy偕師妹陳詩雅和楊汀叮出席《夠Yeah暢遊迪士尼黑色世界》，對於早前被拍得與陳偉霆（William）睇戲後，在男方家過夜，她說：「嗰晚我同成班朋友一齊，佢都係我好朋友之一。（你喺佢屋企過夜？）冇，如果有就影番我朝早出嚟嗰張相啦！嗰晚睇完戲，成班人上咗佢屋企傾偈。（經理人Kim唔畀拍拖？）佢冇唔畀我同任何人拍拖，日本嗰邊經理人都冇，拍拖都係自由，但現在想專注工作。」問到不認戀情，William會否不高興，Baby說：「梗係唔會，我哋係好朋友，仲喺迪士尼識。（認同William拍拖？）同好朋友出街好正常。（之前話同佢係朋友，依家係好朋友係升咗級？）朋友同好朋友一樣，我哋好Close，之前講漏個好字，我哋識咗五年好有感情。依家工作好忙，大家平時都好少見面，我每個朋友都好掛住。」

陳詩雅（右）和楊汀叮出席活動。

Angelababy向在場人士大派糖果，預祝萬聖節。

Fans愛屋及烏

Baby否認戀情，問到是否怕Fans不喜歡，她說：「我啲Fans都幾鍾意William！（咁就公開戀情？）我哋係好朋友！我知好多人想知我私生活，搞到我驚咗，寧願大家將焦點放喺我工作上。」但當記者要Baby向天發誓與William不是拍拖時，她顯得不知所措，起初堅拒發誓，並說：「我唔要，我唔信呢啲嘢！」記者再三叫她發誓時，Baby舉起手指做出屈曲V字手勢，當是發誓，看來她有點言不由衷！

此外，Baby透露在天馬電影公司的《花田囍事2010》中將反串男角，笑言毋須紮胸。而早前她穿比堅尼拍攝公司年曆時，上圍豐滿，她說：「我之前好瘦，瘦到好似外星人。（周秀娜又係外星人？）咁我係喪屍啦！」而Baby早前到日本欣賞脫衣舞派對的相，大讚Sexy，又與索女Leah Dizon合照。

文、攝：名人組