由香港口靚模界殺入日本模界搵日圓嘅Angelababy，見小小So去日本搵佢，不知幾開心。雖然之前Baby請咗幾個支持佢嘅朋友去日本睇佢行TGC，但難得喺日本見到同聲同氣嘅人，當然零舍開心！Baby去日本發展唔單止財源廣進，見識同日文都大躍進，當小小So講開自己唔識日文，人有三急時會用英文問日本人Toilet喺邊，不過好多都唔識聽，Baby即場教小小So日本人點讀Toilet呢個音同日常用語，真係袋咗好多錢落小小So個袋！
每次至少喺日本逗留兩星期嘅Baby，話平時工作好忙，但一返到宿舍點都要聽歌Relax吓，當然唔少得周杰倫嘅歌啦！講開周杰倫，Baby話之前同佢合作拍MV未埋位時，發生咗件好笑事，就係當Baby電話響起時，竟然係用周杰倫嘅歌曲做鈴聲，連周杰倫都聽到：「當時我都幾唔好意思，但周董聽到就笑住舉起手指公，哈哈！」小小So當然問埋佢有冇聽埋「老友」陳偉霆（William）嘅歌調劑吓，Baby話任何好聽嘅歌都會聽，仲話William係好朋友，當然會支持，唔知呢啲係咪以歌曲傳情呢？