鄧麗欣（Stephy）日前與方力申為新歌《七年》，拍攝Neway卡拉OK宣傳廣告，當日一身型仔打扮的小方，化身成攝影師，以價值二十多萬元的專業相機為Stephy影相，期間更細心幫她撥秀髮，公然打情罵俏。二人又應導演要求，近距離靠近對方額頭，表現毫無生疏，一Take過完成任務，事後Stephy笑說：「頭先Feel到佢啲抖氣聲。（有冇尷尬？）咁又冇，都慣咗，平時拍戲都好Close，話晒我哋都合作咗六年啦！（擔心七年之癢？）都擔心觀眾會睇厭，睇公司點安排。」
小方表示平日亦愛影相，更自爆曾影過Stephy的「瞓覺相」，他解釋：「之前同佢去廣州做宣傳，坐車嗰陣佢瞓着咗，咪影佢囉！（會唔會公開Stephy啲相？）唔會，唔驚佢殺咗我咩！」
另外，小方日前在澳門首次舉行簽唱會，吸引逾千名市民圍觀，由於他主持的《美女廚房》在當地大受歡迎，大會安排Fans以食物介紹自己，一名女Fans竟嗲爆地向小方說：「我係澳門美女廚房嘅葡撻呀！外脆內軟㗎喎！」令小方頓時不懂反應，十分搞笑。