胡杏兒是99年的港姐季軍，喜歡演戲的她曾嘗試很多角色，最難忘是02年《流金歲月》中的智障妹妹丁善茵，還有06年《肥田囍事》的200磅肥妹何美田！為藝術犧牲，不演人見人愛的純情美女，無非杏兒喜歡挑戰，為轉型而不斷變形，可能這就是傳說中，選讀生物化學系那種「理科女仔特別Tough」的人辦。
挑戰自我邀合唱
走出公仔箱，杏兒去年推出處女EP，如今已不是樂壇新人，為了自我挑戰，她最近邀請90年代「合唱K歌王」Chilam出山合唱《一刀了斷》：「我讀書嗰陣聽好多Chilam嘅歌，佢嘅合唱歌係樂壇經典，諗都冇諗過有機會同佢合唱，我覺得好榮幸！我哋一齊入錄音室，最初分開錄音，我坐喺監製房聽佢錄先，Chilam把聲好有感情！收到歌詞嘅時候，我畀歌詞同旋律感動，內容係講感情事唔應該拖泥帶水，要灑脫同堅強。Chilam唱出呢種感覺，亦帶動到我！」身旁的Chilam尷尬地陪笑，右邊面上的酒窩令人心醉，難怪杏兒嚮往。
年紀漸長變心軟
下個月踏入30歲的杏兒，曾經將愛情放在人生第一位，被愛情牽住整個人生，成長令她改變：「工作、朋友同旅行都令我增廣見聞，呢個世界真係好大，親情同友情先最重要！」際遇令人改變，好朋友黃宗澤有否帶來改變？她連笑幾聲才說：「我以前可以好決絕，長大後變得愈來愈拖拖拉拉！人大咗，感情唔到你控制；經歷多咗，覺得剩低嘅時間太少，希望珍惜所有，結果變得唔夠決絕，好容易心軟！唔止愛情，我面對朋友、家人同埋屋企8隻貓都容易心軟！」
後記：食物萬能
記者甫抵達現場，先跟Chilam打招呼，他比劃兩吋長度說：「我今日只係飲咗咁細杯小麥草汁，好餓，好High，可以埋位了！」其後見到剛剛吃完一大碗湯麵的杏兒，她一邊補妝一邊說：「飽飽，好滿足，可以埋位了！」食物可推動力量，無論是餓還是飽！
