樂壇天后容祖兒（Joey）昨日與蔡卓妍（阿Sa）拍住上現身《萬人大巡遊》與《向國旗致敬》活動，齊齊揮動全世界最大的國旗。一班歌手雖然在烈日暴曬下等待儀式開始，仍毫無怨言，獲安排企於正中位置的Joey謙虛地說：「咁大個中國面前，都冇乜話幾大幾細。」感性的Joey被阿Sa踢爆在揮動國旗一剎那流下感動的淚，阿Sa說：「好驕傲，差啲想喊！見Joey真係喊咗出嚟！（攰唔攰？）都唔會，係太曬都有少少暈，但心情興奮乜都忘記啦！」Joey則表示在揮旗時感到非常光榮：「見到兩旁嘅人，都忍唔住伸個頭出去揮手。」不過，近日自爆暈倒家中的阿Sa，坐上有蓋古董車巡遊時只揮手微笑，未有如其他歌手般揮動大國旗，她說：「好興奮，如果遊多轉就好喇！」

放大圖片	祖兒全程照顧阿Sa，一把傘兩份遮太陽！	放大圖片

揮完藥到病除

最近忙於穿梭中、港、澳宣傳國語專輯及出席不同活動的Joey，早前也同樣病倒，但仍細心照顧帶病上陣的阿Sa，Joey說：「初初佢都話暈暈哋，揮完即刻精神百倍，我本身都唔舒服，依家藥到病除！阿Sa係太后，我係小太監照顧住佢！」不過這個「太監論」，阿Sa則不太認同，反笑兩人在服飾上似足「乒乓孖寶」，她說：「其實我哋都係海軍鬥水兵！」此外，Joey近日忙於為其入行十年音樂會綵排，感激母親留守至深夜，更為她準備晚餐。

謝安琪與梁詠琪齊齊舞動大國旗，現場不少途人歡呼喝采！	放大圖片	樊少皇在晚會上舞獅，展示一身好「舞」功。

對於阿Sa的身體狀況，英皇唱片及藝人管理部總監霍汶希（Mani）表示已下令她休息：「呢段時間本來係開戲同錄音，咁啱套戲延遲咗五日先開，所以下命令除咗錄音，唔可以幫阿Sa接工作，畀佢休息！」Mani又透露已承諾阿Sa於明年初可放假一星期。

文：音樂組　攝：吳文聰