官恩娜（Ella）及江若琳昨日在街頭派螢光棒，與歌迷及市民共度中秋，並宣傳電影《同門》，Ella與Fans近距離接觸，忘卻三年前中秋活動上被人強吻陰影。事後記者提醒她，她才恍然大悟地說：「係喎！我已經完全唔記得件事，只係記得下星期去黃金海岸做嘢，雖然我唔記得，但年年都有人提起。（頭先驚唔驚？）唔驚，啲Fans都識嘅！」
此外，江若琳透露中秋節會跟家人吃飯，其後與朋友及師弟妹聚會狂歡，她笑說：「同家人過節會玩家鄉廈門遊戲，我屋企屬大家族，令我有奇想，想返鄉下開個迷你演唱會，回鄉表演係一種光榮！」問到節日可想過二人世界？她坦言已年多沒有拍拖，雖有追求者，但覺得不合心意，她說：「好想（拍拖）！啲朋友都一對對。（每逢佳節倍思『春』？）係呀！如果可以整月餅畀另一半食就好囉！」