本文重點
香水能提升女性魅力，熱愛香水的莊思敏，由初中開始已收集，認為除香氣撲鼻外，還有辨認功效，故她一直眾裏尋「它」，希望找到一種屬於自己的香味。
莊思敏喜愛香水是因為其獨特的香味，由首支Calvin Klein香水開始，她已有逾半百珍藏，她說：「當我聞到某種香味，某個朋友就會出現喺我面前，我都想搵到一種香味，令人諗起我！可惜我好花心，不停試都未搵到支適合！」
她特地為這批心頭好訂造玻璃櫃：「要香水味道持久，千祈唔好放喺陽光照到嘅地方，否則好快玩完！」由於屬於自己的香味難求，她抱着隨緣心態：「我依家都係睇心情噴香水，何況香水要隨年齡去轉，唔同年齡要用唔同嘅香水。」問到男友吳浩康有否送她香水，她笑說：「我買畀佢就真！」
噴香水返學被罰
香水亦為莊思敏帶來不少難忘回憶，令她記憶猶新：「我有一段長時間好鍾意用Hugo Boss香水，每次打籃球，都會勁噴香水落球衣度，搞到隊友成日鬧我，話好刺鼻喎！」她還自爆曾因噴香水而被學校處分，令她瘀足一世：「學校唔畀噴香水返學，但我唔理，噴到成件冷衫都係香味，點知有次經過教員室，畀人捉到正，之後罰我企喺學校嘅中央位置，仲企足15分鐘，全校人都睇到，真係好瘀呀！」