獲封「巨肺小天后」的G.E.M.，一向視Eason為偶像，13歲時獲安排與對方拍廣告，她仍記得那天自己心跳加速：「當時我同其他女仔都唔敢主動同佢傾偈，之後佢同我講嘢，面都紅晒！」如今她已踏入樂壇，更獲Eason點名力讚，齊齊在《勁歌金曲》一起Jam歌，她坦言發夢也想不到：「我細細個就儲Eason嘅CD，好鍾意佢嘅曲風，尤其係唱Live，超級有水準，依家入咗行，仲有機會一齊唱歌，自己企喺佢隔籬都好驚，始終係偶像。」
成人禮樂翻天
去年出道即獲前輩古巨基及Eason力讚，接下來電影及廣告均向她招手，身價上升，連初出道時公司墊支給她的六位數字人工，她都一口氣還清。其實她的音樂人生早已展開，14歲那年參加音樂比賽，被經理人發掘入行，如果當年有《超級巨聲》，她坦言一定參加：「細個受父母影響鍾意音樂，佢哋冇反對我入行，有次唱歌比賽贏咗冠軍，有人問我有冇興趣做歌手，佢就係我經理人！」
G.E.M.滿懷理想，可是大家別忘記她只是一名剛滿18歲的半熟少女，早前與逾百名歌迷舉行生日會，並宣布成立歌迷會，這一天她很快樂：「我永遠會記住呢一日，好似人生嘅新一頁咁，嗰日同歌迷BBQ、玩遊戲，真係好想同佢哋講聲多謝！估唔到18歲生日有咁多人同我過，咁錫我。」成年禮後，她坦言不會像從前般任性，更已定下目標，就是在樂壇闖一番成績報答父母和Fans 。
圈外緋聞男友
在處女碟親自作曲填詞，寫盡少女心事，G.E.M.的成名作《Where Did U Go》是寫給前男友，近期新作《All About You》則自爆要送給「未來男友」：「我聽過好多朋友喺愛情路上唔開心，突然有感而發，想寫一首歌畀未來男友，如果我遇到一個男仔，我會好勇敢去表白，唔會驚同怕醜。」近日與外籍有型監製Lupo傳出緋聞，她笑着否認，表示對方只當她細路女。莫非圈外緋聞男友Aaron Wong才是「真命天子」？她指雙方是好友：「唔知第時會唔會係，依家係好朋友，佢好鍾意唱歌，我個人咁巴喳，人哋未必鍾意我。」
後記：減肥
模拋胸露背成為近期熱門話題，本身是「有料」之人的G.E.M.，卻堅決向Sexy說不！她近日開口埋口表示要減肥，相當貪靚：「我最重時108磅，好肥呀！（你青春期喎！）依家做運動，盡量戒澱粉質，以前朝早要食個牛肉飯，依家唔敢喇！希望減到95磅。」