剛推出新專輯《If I am》的新興樂隊Mr.，主打歌《如果我是陳奕迅》和《Mr.Tam》均大獲好評，新碟預購更逾5,000張，人氣急升，更獲前輩陳奕迅（Eason）及校長譚詠麟激讚。而主音Alan的聲線，被指神似「K歌之王」Eason，難得Alan並不介意，又表示能與Eason同台演出，深感榮幸。

Mr.獲讚賞，猶如打了強心針。	Alan十分享受與陳奕迅合作的感覺。 資料圖片	Alan的音樂漸為外界認識，當然感到高興！

Alan說：「我唔介意啲人話我把聲同佢似，依家我連首歌都整埋出嚟，其實愈嚟愈唔似。」談到與Eason合作，Alan坦言非常享受：「以前夾Band，從來冇諗過可以同佢同台，起初我有啲驚同怯，唔敢望住佢講嘢，不過佢令我哋放鬆，又鬼主意多多，又鍾意玩聲，同Eason及校長可以喺音樂上有好多變化，喺台上擦出火花。」

吹水拒講是非

問到有否習染Eason的愛吹水性格？Alan笑說：「都OK啦！有時喺後台等幾粒鐘先出場，的確係好悶，所以會不停吹水消磨時間，我哋話題都係講音樂為主。（八卦佢啲是非？）唔會問。」除了音樂上交流外，Eason亦向Mr.傳授在樂壇生存的秘笈，Alan說：「撇除音樂話題，Eason教我哋喺呢行最緊要開心，要寬容面對啲新聞，其實呢啲道理，套用喺任何人身上都合用。」

紅唔紅等運到

Mr.五子合作愈見純熟及有默契，Alan說：「大家合作得愈來愈好，以前夾Band各有各生活，依家就差不多日日見，所以我哋各自放假，反而唔會見面，想有番啲私人空間，因為平時日日見，驚冇咗夾Band火花。」談到漸為外界認識，Alan坦承感到高興，他說：「出街有人認得我哋，至於能唔能夠好紅，好睇環境因素，總之Keep住做好音樂，同埋要入屋。（獨立發展？）我唔會，一個人做音樂好辛苦。」談到勁敵RubberBand發展亦不錯，Alan則謂大家互相尊重，屬良性競爭，他們私下亦相當友好。