黎明今個禮拜冇蒲頭，金句王之位爭崩頭，究竟徐子淇話個女似鄭則士搞笑啲，定係黃長發當鞋王三奶Karen係Customer（客人）絕呢？
徐子淇
「我之前望佢（李晞兒）覺得佢似Martin（李家誠），依家反而似一個人，終於畀我諗到佢似鄭則士（肥貓）！」
解讀：子淇可能睇得多《肥貓流浪記》，被鄭則士嘅演技折服，但係依家似鄭則士就好喇，大個都係似媽咪好啲，起碼夠靚！
黃長發
「我視佢（Karen）為陌生人，就算佢嚟我做嘢間咖啡店，我都只會當佢係Customer（客人）！」
解讀：乜黃長發唔係由識Karen嗰刻開始，就
已經當佢係Customer咩？定係佢依家先肯講出心入面嗰句？
周汶錡
「我會叫佢（男友Julien）小心啲，因為佢好單純！」
解讀：其實地球咁多誘惑，真係好危險！睇嚟周汶錡都好單純喎！佢同男友咁夾，不如快啲結婚啦！
徐淑敏
「佢（黃重生）不嬲都好有女人緣，係好人一個！」
解讀：徐淑敏大讚前男友黃重生有女人緣，擺明派定心丸畀未婚夫黃浩啦！佢咁識做，抵佢嫁得好。
鍾嘉欣
「佢（林峯）一啲都唔蠢，好叻！」
解讀：落選港姐鍾溥敏用粗口諧音寸林峯，嘉欣咁講有好有壞，好處當然係證明林峯真係好叻，壞係嘉欣出賣咗自己，證明佢緊張林峯！