昨日o靚模Lavina（鍾蕙芝）、Rainbow（胡心諾）、Monique（周凱盈）、「柑桔」陳蕊蕊、「翻版蔡少芬」Roxanne、「翻版周麗淇」Suey齊齊「升呢」為商場行天橋，過往已不屑o靚模的莊思敏（Jacquelin）則獲邀以專業模特兒身份做導師，雖然獲大會肯定地位，但Jacquelin仍然一肚火，台上狠踩Rainbow寒背，後台接受訪問待Lavina、Rainbow走開馬上連珠炮發，直言被擺上枱，事先不知與o靚模同場：「着咗火成個鐘，為咗專業即場走好肉酸，經過今次，以後接工作會問清楚，接嗰陣工作人員話係教新進Model，到廣告出街有朋友見到先同我講係同Rainbow一齊，有啲愕然！開頭以為一個半個，嚟到先知係一群。（嫌棄呀？）我唔介意教新人，不過佢哋嘅高度行Show好勉強，進入Model事業係個缺點，夏天短裙、短褲都可以，大牌子同歐洲品牌就唔啱長度，四肢健全都可以學Catwalk，但係咪做到全面Model係兩回事。」

Rainbow（右）和Suey在台上行騷，展現青春活力。	「柑桔」陳蕊蕊和Monique示範不同服裝。	放大圖片

主辦商反擊早知情

Jacquelin聲稱事先不知與o靚模同場，因而大罵被擺上枱，但活動搞手亦是Lavina和Rainbow的經理人Admond接受電話訪問作出反擊：「三個星期前已經賣晒廣告，四周都有海報，唔知都係因為佢貴人事忙啫！我都有發E-mail畀佢。」記者再向莊思敏求證，她說：「接嗰陣真係唔知，中間人冇講，簽咗先見到廣告，佢個E-mail都淨係得Rainbow同陳蕊蕊，當時我都接咗，唔到又畀人話我失場。」

另外，有指Jacquelin與富家子黃千肯鬧緋聞，前晚她在又一城出席《Pretty In Pink. In Here. At Festival Walk》時裝匯演時，為求向男友吳浩康派定心丸，堅稱與黃千肯只是朋友關係。

文：影視組