電影《竊聽風雲》於內地勁收7,500萬，香港開畫8日則收800萬，成績令人鼓舞。電影公司前晚特設慶功宴，爾冬陞、劉青雲、古天樂、吳彥祖和陳偉霆等開香檳慶祝，爾冬陞坦言投資方心急拍續集。

爾冬陞踢爆曾有天王級演員向他擺架子。

眾演員出席慶功宴，賀新片報捷。

「唔可以依賴明星」

談及導演杜琪峯斥某些香港演員有氣燄後，爾冬陞說：「我勸阿杜唔使嬲，真正嘅天王唔係咁，畀面色大家睇嘅只係隕石嚟！（有人畀氣你受？）曾經有部戲，有投資方提議搵一位天王級演員，約四次都係經理人出嚟，我拍咁多年戲，驚咩啫？但唔會怪演員，可能佢未必知。（邊個？）無謂講。（依家變隕石一閃即逝？）仲有啲星光。呢行禮貌最重要，唔需要擦我鞋，大家互相尊重，我好認同馮小剛話『我哋需要明星，但唔可以依賴明星』！」

而爾冬陞稍後開拍《鎗王之王》，最近忙於睇景，深感天氣太熱，有意在許可的情況下裝冷氣。早前拍戲暈倒的古天樂最贊成：「最慘連續2日冇得瞓，每日踩十幾廿個鐘，等人轉景即瞓，試過睡姿唔好，搞到半邊身郁唔到！TVB有2個鐘抖，拍戲真係冇，惟有飲多啲水同用酒精紙巾抹身降溫。」

文：影視組