今年五月，關心妍出席公開活動時曾揚言，希望七月生日有人求婚，事後便傳出十月二十四日將與金融才俊男友楊長智（Jonas）於印尼峇里結婚擺酒，並由林以諾牧師出任證婚人。

據知Jade正身在歐洲，與未婚夫Jonas旅遊預支蜜月兼揀婚紗和禮服，故未能聯絡她求證婚訊，不過，記者卻聯絡上林以諾牧師，他稱要與Jade當面傾婚事，下月將公布詳情，就林牧師的說法，間接承認這樁喜事。

bma送祝福

問到是否為Jade擔任證婚人及籌備婚禮？林以諾說：「佢飛咗去第二度，好似歐洲，一直未能同佢詳談，呢啲事要當面傾好啲。（十月二十四號行禮？）唔好意思，等佢返嚟再講。（點解會搵你做證婚人嘅？）我每次搞傳道活動，Jade都好幫手，佢未婚夫都係基督徒，成日一齊返教會。（幾時可以透露婚訊？）你哋八月搵我啦！」另外，Jade前唱片公司bma發言人表示，Jade的合約剛滿，至於婚訊，發言人說：「未得到肯定，如果真嘅話，恭喜佢，希望佢幸福。」