藝人每次出席公開活動都會有助手或工作人員喺側邊護駕，一啲當紅明星隨時隨地都有四、五個男女助手跟出跟入，不過據小小So所知，並唔係所有明星或歌手都有同等待遇，甚至會被拒諸於門外！
就好似夏韶聲咁，早前佢帶埋個女去咗樂壇女新人羅守淼（Leslie Loh）嘅見面會，雖然活動喺夜晚舉行，但由於當日天氣酷熱，再加埋現場啲射燈照到正，着住T恤牛仔褲嘅夏韶聲熱到滿頭大汗，當佢影完相，諗住入去會場歎吓冷氣之際，竟然有個唔知好歹嘅男工作人員唔畀佢入去，原因係因為Leslie就快會出嚟影相，佢要求夏韶聲企喺門口等一陣，小小So就聽到兩個人就咁企喺門口對峙咗一陣：
夏韶聲： 我想入去……
工作人員：你等一等先，陣間先畀你入！
夏韶聲：（滿頭大汗）呢度好熱喎！
工作人員：Leslie好快會出嚟影相，不如影埋相先入去！
夏韶聲：（無奈）OK……
咁嘅情形，連小小So都勁無奈！