在剛過去的《第十三屆富川國際幻想電影節》中，家輝憑英皇電影《証人》榮獲「最佳男主角優秀表揚獎（Special Mention）」，至於老友兼導演林超賢則擊敗超過二百名對手，榮登「最佳導演」寶座，雙喜臨門令家輝相當興奮，更於頒獎禮舉行期間即場致電導演林超賢「報喜」，但卻因長途電話線路問題，打了三次才能與對方取得聯絡，更足足傾了十分鐘才收線。

經記者起哄後，張家輝才肯在篋內找出獎座。

當地影迷紛紛向張家輝索簽名。

機場摷獎勁狼狽

家輝昨午凱旋歸來，吸引大批傳媒到場接機，但他竟搞笑地將獎座放於篋內，他擔心打開篋後會令底衫褲跌出，記者要費多番唇舌才肯拿獎座出來，期間他笑言會狂加片酬：「加！加夠一百！（一百日圓？）港元呀！一百萬，你哋幫我寫大隻啲！（老婆有咩反應？）佢叫我請食飯！（生BB慶祝？）你估話就得咩？有就好喇！」他又透露在韓國期間每天均狂擦韓國燒烤，又自爆因語言問題而導致差點未能上台領獎：「都唔知佢哋叫我，好彩有助手提水咋！」

老闆搞慶功慰勞

至於導演林超賢則因趕拍新戲《火龍》而未能前往赴富川領獎，事後他接受電話訪問時說：「個女本來話代我飛過去攞獎，但大會安排唔到，佢猛話好可惜！其實拍嘅戲得到唔同地方嘅戲迷認同，感覺難以言喻，希望嚟緊九月開拍嘅《線人》（《証人2》）都同樣地獲得大家肯定啦！」此外，《証》片老闆楊受成知道台前幕後再下一城，隨即於昨晚舉行慶功宴，家輝更親手將獎座轉交林超賢，場面熱鬧！