在《七小福五十周年「少年出英雄」相片展覽巡禮》活動上，接近三十名新舊成員濟濟一堂。但對於桃李滿門的于占元來說，膝下徒兒又何止當日赴會的二、三十人。自「中國戲劇學院」解散後，學員即各散東西，部分因事缺席活動，但亦有上文約十數人，自學院解散後，便一直音訊全無。

元音翻觔斗唔使抖

對於未能成功召集全體成員聚首一堂，七小福50周年活動搞手之一的元彬不無唏噓地慨嘆：「其實你哋（指失散弟子）知我哋喺邊（口架）！點解你哋唔出嚟呢？你哋如果睇到報紙，可以聯絡我哋任何一個（口架）！大家做咗師兄弟咁多年……人生試問可以有幾多個五十年呀？」

而在失散師兄弟中，以元音及元文（孟元文）的不辭而別最令大家心疼，皆因二人的功夫底子了得，假如當初沒有放棄演藝生涯，也許亦如成龍、洪金寶他們闖出一番名堂。

元音是鄧碧雲姨甥，亦是林鳳乾兒子，他不僅生性聰明、長得標致，且更有獨當一面的技藝，可惜最終「走火入魔」，中途輟學，逐漸消失於七小福的生活圈子裏。元彬說：「其實元音打觔斗好叻㗎！佢無論坐喺度、瞓喺度都可以打到觔斗，佢一打仲要唔停得手，可以打到口水鼻涕係咁流都仲唔停，直情可以話走火入魔。不過自從有一次佢打到受咗傷之後，好似有陰影咁，成日都徘徊喺想打同唔想打之間。」

元文資質好成名早

另一失散的元文亦非常突出，既天生一副好嗓子又生性聰敏，花旦、花臉、老旦及老生等樣樣行當齊全，極吃得開，亦較早成名，元彬說：「元文好早已經做主角，當時我哋仲只係做緊武師。」

可惜因為一次傷腳，元文就毅然退居幕後，元彬說：「喺一次表演，元文跌斷咗隻腳，之後好多高難度動作都做唔到，最後唔知係咪因為面子嘅關係，佢就離開咗呢行，其實我哋大家都好掛住佢，佢係咁多個最有天分嘅一個。」就連七小福小師弟元輝亦念念不忘：「早幾日我發夢先見到佢，好想知佢過得好唔好，希望佢快啲聯絡我哋啦！」

一起學藝、一起捱打，師兄弟姊妹的「情誼」就這樣不知不覺地建立；雖然至今有人成名、有人失散，但他們的關係卻是牢不可破。原來當日若非一份「非常合約」，這份「情誼」可能永遠無法滋長……