所謂「樹大招風」,盛傳書展首日勁賣8千本寫真集的Angelababy,因銷量一枝獨秀而成為眾矢之的,有指其寫真要漏夜加印1萬本應市,短短兩日已穩袋逾百萬元!另有消息指Race的寫真集同樣勁賣8千本,令篤數疑雲籠罩書展!同樣推出寫真集的Annie G.與椋名凜經理人王友良,昨日率先開戰暗寸有人篤數,其中有「翻版Angelababy」之稱的「八模兵團」成員Annie G.,昨日在Hailey C.陪同下到書展巡視,除走訪她們的Counter外,更直踩Baby與Kama的攤檔視察軍情!
Annie G.踩場寸爆
Annie G.甫抵達Counter即不停望錶,記者問她所為何事,她竟質疑Baby的銷情:「我睇報紙知佢日賣8千本,即係1分鐘要賣11本!所以我頭先望錶數吓有冇咁多囉!我覺得1分鐘有11個人睇佢本寫真唔出奇,但未必可以賣到11本囉!(嚟踩場?)唔好咁講,行吓啫!」同樣推出寫真集的椋名凜,其經理人王友良亦暗寸有人篤數:「我好想知道點喺5至6秒賣出一本,點漏夜加印1萬本,我覺得好有趣,真係冇咩可能做到!」至於寫真首日銷量僅次Baby的周秀娜,昨日宣傳時與「篤數o靚模」劃清界線:「人哋嘅嘢我唔方便評論,我同公司都好虛心同誠實,呢啲唔會影響我心情,盡力做就得。」
Race澄清數字錯
對於慘遭圍剿,Baby經理人Kim反擊說:「Annie G.踩場咁得意?佢鍾意點就點,我冇Feel亦控制唔到,搞是非嘅嘢唔關我事。」她拒絕透露Baby寫真的最新銷量,但強調寫真集於書展首日早上已售罄,並指寫真首印2萬本,除書展外,在書報攤亦有售,而加印的1萬本將於明日運到,她說:「我唔知今日賣咗幾多,總之尋日賣晒,出版商話會補書,但加幾多唔知。」同樣惹質疑的Race,其經理人表示8千本銷量純屬美麗的誤會:「全世界都話我哋賣咗2千本,其實8千本係出版商印書嘅數目,我相信係言語上嘅誤會。」
記者昨日走訪Baby的書展Counter,由於她與Kama的攤位相連,情況極度墟冚,多次出現排隊等畀錢人龍。Baby Counter的工作人員見群情洶湧,忙得沒有時間將寫真集上架,要直接開箱售賣,為節省時間及疏散人潮,更以紙皮箱作臨時收銀處,證明Baby的寫真集真的大受歡迎!
08寫真吸金雙后
寫真銷量暫居No.1的Baby,去年已跟趙碩之當選書展吸金王,今年碩之避戰,且看她能否再下一城!
趙碩之
趙碩之去年推出《趙碩之夏》,售價68元,書展期間售出1.5萬本,總銷量更高達4萬本,營業額共272萬元。
Baby
Baby去年推出的《Love Angelababy》售價120元,總銷量2萬本,營業額共240萬元。





