香港愈來愈熱，喺街度就算唔郁都成身大汗，更何況喺戶外工作。日前小小So喺電視台見到鄭嘉穎背脊濕咗一大片，原來佢啱啱拍完《鐵馬尋橋》外景返廠，連講嘢都上氣唔接下氣，認真陰功！
小小So：嘩！做乜背脊濕晒㗎？
嘉穎：冇辦法啦，拍古裝係咁。今日算好，只係着兩層衫，布料又唔太厚，唔係仲加辛苦。其實我都知道有啲礙眼，應該着多件毛巾衫喺內面吸汗，但天氣實在太熱！
小小So：你有咩消暑方法？
嘉穎：平時會帶把風扇仔跟身，我見過有藝人用冰鎮頸箍，但一陣就冇效。由於太大汗，化咗妝一陣就溶晒，有時索性唔化妝，同馬國明唔使埋位時，就一齊除晒衫曬太陽，曬黑啲連黑眼圈都遮埋，仲可以散熱，真係一舉兩得！
小小So：有冇試過拍外景熱到病？
嘉穎：梗係試過啦！上年拍《烈火雄心3》時，現場放火之餘仲要打大燈，搞到好似個火爐咁熱，我焗咗45分鐘不停喘氣，仲連下午飯都食唔到，好似中暑咁真係諗起都怕怕！