這段慘痛時刻，元彪亦沒有忘記，他說：「呢件事上，香港政府有接濟我哋，幫我哋畀機票錢，可以返到香港先還，不過要我哋將護照交畀政府保管，還清啲錢先攞得番本護照。當時有啲師兄弟選擇留喺美國，我都留咗10個月，試過喺製衣廠做車衣又喺超市執貨，做過好多行之後都覺得唔啱自己，儲夠機票錢我就選擇返香港。」

師傅心中有愧

而選擇接受政府援手的元輝，印象最深刻是和師傅分別的情景，他不禁感嘆起來說：「離開美國去機場嗰日，師傅嚟送車，嗰時佢真係百感交集，我哋第一次見到佢眼濕濕，我知佢係覺得對我哋唔住，不過冇講出聲，佢冇講都好，講咗我會覺得受寵若驚，仲難過。」

雖然沒有在徒弟面前有所言語，但于師傅原來曾靜靜打長途電話給徒弟的家人道歉，有關道歉的一字一句，元彪到今天仍牢牢記住，他說：「我都係後來聽番其他師兄弟講，師傅曾經打電話去徒弟屋企，同佢哋屋企人講：『我于占元對唔住你哋，如果第日我返香港嘅話一定會請你哋食飯，斟茶賠罪。』」

經濟狀況堪憂

當年師傅和師叔、師母一起留在美國，生活並不如意。元彬坦言一班師兄弟都很擔心師傅的狀況：「師傅落難美國，我哋師兄弟都好想幫佢，之後師傅同師叔喺羅省一間餐廳飲嘢嘅時候，師叔突然喺師傅面前死咗，我哋聽到呢個消息就更加擔心。不過我哋當時個個都同電影公司簽咗約，唔行得開，而且師傅唔會肯畀人幫，好似86歲嗰年我哋請佢返香港擺大壽，佢行路都唔畀人扶佢。」

于師傅畢生願望是希望將京劇發揚光大，最後卻落難美國。雖然如此，他仍挺直腰板不肯接受徒弟的幫忙，直到後來七小福個個名成利就，于師傅仍留守美國，無意叨徒弟的光，只過簡簡單單的生活便心滿意足。

遇人不淑的于師傅，怎也不願返港，縱使身在沒有鄉情的美國，亦惟有慢慢適應異鄉的生活。可能遭逢巨變，加上晚年清苦，想不到當日令徒弟聞風喪膽的于師傅，竟會成為徒兒的開心果……