純情靚女汪圓圓早排同男友分手，正式結束初戀。身為老友嘅小小So梗係好擔心佢，早排約咗佢出嚟High Tea。小小So見佢個樣有啲憔悴，加上前排又話佢提起分手就眼濕濕，忍唔住問佢係咪仲唔開心，但佢話唔係，仲話上咗寶貴嘅一課。
小小So：話你眼濕濕喎？
汪圓圓：唔係，我冇眼濕濕，我哋係和平分手嘅。人哋話我哋拍得幾個月拖，其實唔止咁少㗎，都有八、九個月！
小小So：今次初戀學到啲咩？
汪圓圓：學到好多嘢，除咗學識點同男友相處，亦喺同佢一齊時反映出自己係個咩性格嘅人，更加了解自己。我哋依家仲有聯絡，大家係朋友，心情亦已經平復咗。
小小So：咁做咩你個樣仲咁憔悴？
汪圓圓：係因為我成日去醫院探姨甥仔James，抱佢時掂到佢啲口水，畀佢傳染咗，搞到有少少唔舒服，我都要多多休息先得喇！呢兩日喺屋企按摩吓條頸，推吓頸位嘅淋巴。