性格率真的李詩韻,回答「大起底」題目時輕鬆自若,一口氣全部作答,她大方透露初戀歲數及「被撇」感覺,還自爆飲食無王管,最愛半夜食薯片飲汽水,平日又無辣不歡,果然事無不可對人言!
童年題
問:有冇玩過Barbie或煮飯仔呢啲遊戲?
答:梗係有。
問:幾多歲開始拍拖?初戀嘅感覺係點?
答:十七歲,感覺自己好怕醜,當「被撇」失戀之後好傷心,要三個星期先復原,足足瘦咗十幾磅。
解碼:
李詩韻自言向來戀愛大過天,而鍾意玩Barbie原因是可代入大人世界,做大人做的事情,例如Shopping及拍拖。
飲食題
問:食唔食得辣嘢?食過最辣係乜嘢?
答:我好食得辣㗎!最辣試過喺四川食麻辣火鍋,個火鍋放滿辣椒,食完之後個嘴即變成孖膶腸,仲要成兩日先消晒腫!
問:有咩古怪飲食習慣?
答:一到深夜一定會飲可樂食薯片,好唔健康嘅習慣,不過冇辦法,愈夜就愈吊癮!
解碼:
李詩韻飲食習慣並不健康,不過她冇有怕,皆因一切以食為先,她說:「我不嬲食嘢都唔錫身,最緊要有得食,最鍾意食甜品,食完飯之後,都會食番個芝士蛋糕同埋薯片,所以成日畀人問我係咪食飯唔夠飽。」
衣着題
問:鍾意着褲定着裙?
答:梗係鍾意着褲啦!
解碼:
原來李詩韻一向論盡,所以鍾意着褲,她說:「我唔係因為男仔頭而唔鍾意着裙,只不過我好論盡,平時食嘢成日整污糟件衫、又會撞到周身瘀,如果着裙好易走光,所以着褲就有安全感多啲,唔使擔心咁多。」
生活題
問:對於着鞋唔着襪有咩睇法?
答:如果着涼鞋就冇所謂,不過着普通鞋唔着襪,我就接受唔到,一來我怕唔着襪會更加焗,二來最怕聞到臭腳味。
問:一日最多試過沖幾多次涼?
答:平日我會早晚各沖一次涼,最多試過一日沖四次涼。
問:會唔會攰到唔沖涼就瞓覺?
答:唔會!
解碼:
李詩韻注重個人衞生,難怪她自嘲有潔癖!她說:「我真係好怕污糟!我未試過着鞋唔着襪,着鞋唔着襪畀我嘅感覺好似着衫但係冇着底衫褲咁,好似好怪!如果唔沖涼就撻落床瞓覺,第日我要會換晒啲床單,咁仲麻煩!」