眾所周知，官恩娜（Ella）係圈中出名嘅傻大姐，一舉手一投足都滲透出陣陣傻到你唔信嘅味道！總之有佢喺度，可以話一定Make Some Fun！最近《變形金剛2》上畫，令小小So諗起一次同Ella嘅對話。
小小So：你話你細個都有追《變形金剛》？唔係啩？
官恩娜：係真(口架)！細個阿哥要睇，逼埋我睇。我哋唔只睇(口架)，阿哥仲要我扮埋一份！
小小So：機械人嚟喎！點扮呢？
官恩娜：阿哥扮博派，佢死都唔畀我扮嗰架貨櫃車！
小小So：你係指柯柏文？
官恩娜：係呀！我唔夠佢爭，佢就逼我扮嗰架飛機！
小小So：麥加登？
官恩娜：係呀！係呀！跟住我哋兩個咪對打囉！阿哥係博派，我係邪派。
小小So：你話乜派話？
官恩娜：邪派呀！
雖然小小So當時唔可以學變形金剛咁，即場變成部錄音機錄低佢自創嘅「邪派」。唔理博派又好、狂派又好甚至邪派都好，Ella呢種傻得可愛嘅態度，小小So久唔久都會攞番出嚟回味。講真，佢喺唔詆毀人下又可以搞Gag，Not Bad！