由於每天要應付的動作實在能人所不能，所以七小福常會求饒。不過也因師傅手上所執的無情「藤鞭」，他們年紀輕輕已歷盡苦楚，故最終均能將潛能引爆，發光發亮，今日在影圈炙手可熱，盡皆動作全材，就全靠個個由「不會」變成「會」！

他們日常所要應付的跳火圈、跳高枱及拗腰等高難度動作，即使大人也要投降。但正是「成功須苦幹」，他們能完成如此能人所不能的「使命」，師傅的「鞭策」實在功不可沒。

跳高枱人人嗌怕

對七小福來說，倒豎葱、趴虎、虎跳、掃堂腿及一字馬等早已視作等閒，但跳高枱則不是開玩笑的。于師傅將一張飯枱搬到較正中位置，然後叫徒弟一個跟一個的跳過去。由於那張飯枱只比他們矮半個頭左右，很多未跳前已嚇至腳仔軟，紛紛耍手擰頭。不過嚴厲的于師傅又豈會讓他們就此放棄，每見勢色不對，必會拿起手上的無情「藤鞭」，一下一下激發他們體內的無限潛能。

在跳枱上下過不少苦功的元秋，對元紅受「鞭策」才得以完成這項「Mission Impossible」仍記憶猶新：「元紅好搞笑，每次輪到佢跳，佢都會用上海話同師傅講：『阿啦勿會！（我不會）』本來有幾次佢都蒙混過關，但有一次師傅終於忍唔住用條鞭打佢，元紅即刻嚇到成個人跳咗出去，咁就成功喇！跳完之後，佢即刻擰轉頭同師傅講：『阿啦會啦！』」

大拗腰個個叫苦

除了用鞭外，于師傅還會用自己的一雙手，幫助徒弟完成高難度動作，曾身受其苦的元甫、元蓉及元麟說：「以前細個覺得拗腰好難，咁師傅就會坐喺張櫈度，叫啲做唔到嘅瞓喺佢大髀上面，然後出力咁掹『行』佢對手同腳，幫佢拗彎條腰，好痛(口架)！」

縱然吃盡苦頭，但滿師後回想起當年的苦日子，無不感激師傅的悉心教誨。元彬時刻都為出身自七小福感到無比自豪：「就係因為師傅係唔係都打，我哋好多人出嚟做武師，相對嚟講受傷比較少，亦冇人會跌死或者踩死。呢啲就係由細訓練嘅關係，我哋一Sense到有危險，就即刻會警覺做番啲小動作去補救，等自己唔好受傷，呢啲全靠基礎打得穩，我真係好衷心多謝師傅當年咁教我哋。」

地獄式的鍛煉卻未有埋掉他們的童真，即使如何刻苦亦有不正經的時候，天真爛漫加上野性難馴，上台演出就難免甩甩漏漏，笑爆收場了！