03/07/2009

播放本新聞相關短片

是非空姐Hilaire臭名遠播

過去嘅香港小姐確實係美貌與智慧並重嘅標誌,但近年整體質素無可否認逐漸走下坡,小小So或者咁講,「港姐」逐漸「港女」化,今年嘅「港女」代表唔使講當然係是非最多嘅「是非空姐」曾曦寧(Hilaire),小小So最初收到風話佢嘅「港女」行為,包括屈副機師男友買名牌、工作懶散同大鬧台灣酒店。

小小So做嘢最講證據、唔會亂作嘢屈人,好簡單打畀幾個空姐朋友就知囉!諗住大海撈針「了解」吓呢位「是非空姐」,最初諗住大公司咁多人,身邊啲Friend都未必識佢。點知Hilaire個「朵」原來喺空姐界「響」到不得了,真係好事不出門。小小So只係講佢個名,幾個空姐Friend就即刻喺電話如數家珍般狂數佢嘅惡行,佢哋有啲係同Hilaire同機合作過,有啲就係聽聞佢嘅惡行,但各有各講,加起嚟又完全脗合,真係夾埋都冇咁夾,Hilaire嘅報道出街後,再有唔少讀者爆料插佢,有咁多人得閒「注意」Hilaire,佢的確係有「過人之處」嘅。