本文重點
吳浩康（Deep）是唱得之人，每次入到K房，女友莊思敏都會點定歌讓他Solo。不過莊思敏每次都要男友挑戰難度，要他唱女聲之餘，還要他獻唱未聽過的歌曲，她說︰「我好鍾意點佢唱歌，不過會畀啲難度佢，要佢唱女仔歌同啲舊歌，有啲佢未聽過就話唔識唱，我就話：『咁你聽一次啦！』佢音樂感好好，好多時都難佢唔到。不過我就唔會喺佢面前唱歌，因為佢好挑剔，成日都話我唱錯，所以好少唱歌畀佢聽。」
不敢在男友面前獻藝，但莊思敏其實亦喜歡盡情高歌，尤其愛唱男歌手作品︰「我把聲比較沉，鍾意唱男聲，好似許志安咁，佢好多歌我都識唱。」
至愛阿梅哥哥MV
此外，莊思敏自爆入K房的另一目的是看MV︰「我好鍾意許志安嘅《半天假》，個MV以羅密歐與茱麗葉做故事背景，我又好鍾意吳君如同吳鎮宇嗰套戲，所以覺得好好睇。有次同成班朋友玩到冇嘢好玩，於是齊齊去K房，但唔係唱歌，只係齋睇MV，仲狂點阿梅、哥哥同草蜢嘅MV，哥哥嘅《怪你過份美麗》有舒淇同馬詩慧做主角，拍得好靚，個故事又好，勁好睇。」