本文重點
早排旺角諸事不順，發生鏹水彈事件，又有瘋狂小巴剷上行人路嘅意外，搞到小小So唔敢去咁多旺角！前幾日就同班姊妹轉移陣地，去銅鑼灣Shopping，當日見到成日喺日本潮流雜誌《ViVi》出現嘅渡邊知夏子出席商場活動，唔單止有好多Fans捧場，仲吸引好多龍友喪影。
雖然當日落住大雨，但Fans有增無減，小小So逼到入場，最想知當然係渡邊知夏子靚唔靚，結果就有少少失望喇！雖然佢真人幾靚女，蜜糖色肌膚感覺好健康，但就出現「破綻」！
頭頂現駁髮膠
好多日本妹都鍾意玩駁髮，個個都係Set頭高手，點知渡邊知夏子竟然失手，駁咗馬尾嘅佢露晒啲駁髮膠出嚟，頭頂位置仲好明顯見到一粒粒駁髮膠！唔靚事小，依家搞到穿晒崩，畀龍友近距離影到就唔好啦！