紅色雖然夠晒Sharp，不過要着得靚絕非易事。白色可算是紅色的最好朋友，是調和紅色的最佳調味劑，且看時裝設計師郭慶彬（Ricky）如何點評女星的「紅白配」。
趙薇剪裁合適
呢條裙着得佢好靚，紅色襯得佢啲皮膚好白，個Cutting好啱細細粒嘅佢，着到成個人都變得高挑咗同好似公仔咁。
Angelababy畫蛇添足
紅白格仔衫幾靚幾特別，但入面件衫太Heavy！短褲太硬銷條腿，頭花又係多餘唔靚。
林心如簡簡單單
簡單配搭顯示佢幾好身材，條裙嘅褶紋好突出。仲要讚吓佢對橙紅色高踭鞋，好有夏日感覺。
章子怡老土之作
條裙個款好「娘」，加埋個咁怪嘅髮型，好老土。唯一可取嘅係對黑色高踭鞋，同條黑腰帶幾襯。
佘詩曼本周至差
配搭有問題，成個感覺好怪，佢件黑皮背心同黑鞋都好唔夏天。可以換番對尖頭鞋同除咗件背心，會好好多。
韓雪本周最佳
着得好靚，簡單得嚟夠優雅，條裙嘅款式又好青春，好襯佢個髮型。條裙嘅質地畀人好高貴嘅感覺，好適合着嚟行紅地氈。
Profile
Ricky（郭慶彬）主力參與廣告形象指導，入行8年經驗豐富，曾與樂基兒和熊黛林等名模合作，亦曾幫林心如和張可頤設計形象。