李曼筠花了兩小時「掃清」84條問題，最搞笑的是答到其中一條問題「邊個男星係最合適嘅老公/男朋友人選？」時，她竟然要致電友人求救！雖然要坐定定才能答完所有問題，但Maggie自言十分享受當中過程：「平時都冇人會問我呢啲問題，我覺得好得意，因為我好鍾意同人分享自己嘅喜好同習慣！（有冇啲咩問題令你好尷尬唔想答？）冇喎！因為事無不可對人言嘛！」
生活習慣題
問：用乜嘢姿勢瞓覺？
答：抱住咕
，捲成蝦米狀睡覺。
問：開燈瞓定熄燈瞓？
答：開住電腦Mon，當它自動關機時，那麼我都已經睡着了。
問：會唔會要攬住公仔先睡得着？
答：一定要抱公仔才能睡，有安全感啲！
解讀：Maggie的瞓覺習慣特別：「我唔可以喺冇光嘅情況下瞓覺，會瞓唔着！瞓覺一定要攬住公仔，捲到自己成隻蝦米咁先瞓得着，嘻！連媽咪都笑我瞓覺姿勢好肉酸！」
喜好及感情題
問：覺得邊個男星係最合適嘅老公/男朋友人選？
答：選擇唔到喎……我唔識佢哋，要相處過先知。
解讀：Maggie說：「你哋問我邊個男星最適合做老公同男朋友，我覺得好難答，咪打電話問吓朋友有冇頭緒囉！不過最後我都決定答『唔知』，一來怕『順得哥情失嫂意』，二來我係一定要同人相處過先知道對方係咪適合。」
個人習慣題
問：覺得自己係咪購物狂？
答：不算是，但每次買最多東西的都是在Supermarket。
問：Shopping最多試過買咗幾多錢嘢同買咗啲咩嘢？
答：最多在Supermarket買七大袋東西。
解讀：正當大家疑惑Maggie喜歡去甚麼名店或是Boutique掃貨時，原來她最愛的購物地點是超市，試過一口氣買了九百幾蚊日常用品，她笑說：「我都知自己好誇張，嗰次買咗成七袋嘢，要急Call屋企人幫手拎嘢。（買咗咩？）唔知呀！洗頭水買咗幾支，衞生巾又買咗好多，總之買返屋企啲嘢夠用半年咁滯。」
飲食題
問：食過乜嘢最古怪嘅食物？最想試食乜嘢？
答：雞Pat Pat好古怪，咬了一口就不吃，最想試世上最辣的辣椒，挑戰極限！
問：有咩古怪嘅飲食習慣？
答：飲Cappuccino先用匙食完泡才飲，早餐會把食物切到好碎。
解碼：Maggie想試食世界上最辣的辣椒：「我好鍾意食辣㗎！我食過最辣嘅嘢係內地嘅酸辣粉，我點咗勁勁勁辣，辣到食唔晒！」她更有一套獨特吃早餐的習慣：「會將啲嘢切到好碎先食，唔知點解要咁做，可能懶得咬啩！（又唔懶得切嘅？）哈！都話唔知點解咯！」